William Bligh

Dr William Bligh (* woorschinlig am 9. Septämber 1754 z Plymouth; † 7. Dezämber 1817 z London) isch e britische Seeoffizier und Guvernöör vo New South Wales in Australie gsi. Er isch wäge dr Möiterei uf em Schiff Bounty, wo under sim Befääl gstande isch, bekannt worde und wäge dr 3600 Seemäile lange Faart im ene offene Boot vom Oste vo Polynesie bis zur Insle Timor, won er gmacht het mit e baar Lüt wo zuen em gstande si wäärend dr Möiterei.

Dr Bligh het au dr James Cook uf sinere dritte Räis in d Südsee als Navigator uf dr Resolution begläitet und het beobachdet, wie dr Cook uf Hawaii vo Iigeborene ermordet worde isch. D Charte wo dr Bligh uf dere Expedizioon gmacht het, si so genau gsi, ass mä e Däil von ene bis in s 20. Joorhundert no brucht het.

Dr Ruef vom Bligh, wo nid nume äine vo de beste Nawigatore vo sinere Zit gsi isch sondern au e humane Kapitän, isch vo de Familie vo de Möiterer schlächt gmacht worde. Das falsche Bild von em häi au im 20. Joorhundert Romään wie „Meuterei auf der Bounty“ vom Charles Bernard Nordhoff und James Hall und Film über d Möiterei, wie dä vo 1935 mit em Clark Gable und em Charles Laughton oder im Lewis Milestone si Film us em Joor 1962 mit em Marlon Brando als Christian und em Trevor Howard as Bligh, witer verbräitet.